MANILA, Philippines — Walang kinalaman sa politika ang pagbusisi ng mga mambabatas sa panukalang budget ng Office of the vice-president (OVP).
Ayon kay Pangulong Ferdinand Marcos Jr. sa isang ambush interview, bahagi ng proseso ng budget deliberation na alamin kung saan at kung ano ang pagkakagastusan sa pondo ng bayan.
Kada taon ay ginagawa ito sa bawat ahensiya ng gobyerno kaya wala umano itong kinalaman sa politika kundi tungkol sa budget lang na tungkuling gawin ng Senado at Kamara.
“So, parang malayo sa pulitika ‘yun,” anang Pangulo.
Matatandaan na sinabi ni Vice President Sara Duterte na pinupulitika ng mga kaalyado ni Pangulong Marcos ang budget ng OVP.
Nilinaw naman ng Pangulo na hindi sila nagkakausap ni Duterte simula nang magbitiw na kalihim ng DepEd noong Hulyo.
Iginagalang naman ni Marcos ang paghingi ng tawad ni Duterte sa mga miyembro ng Kingdom of Jesus Christ nang umapela noon na iboto ang Pangulo.
“That’s her prerogative. I still don’t understand why. That is her wish, wala tayong magagawa,” ayon pa kay Marcos.