MANILA, Philippines — Dalawampu’t dalawang senador ang lumagda sa resolusyon para pansamantalang suspindihin ang Public Utility Vehicle Modernization Program (PUVMP), na tinawag na ngayong Public Transport Modernization Program (PTMP).
Nais ng mga senador na magkaroon muna ng linaw at maresolba ang mga isyu at problemang dulot ng PTMP.
Tanging si Sen. Risa Hontiveros lamang ang hindi pumirma sa Senate Resolution No. 1096.
Kabilang sa mga lumagda sina Senate President Francis Escudero, Senate President Pro Tempore Jinggoy Estrada, Majority Leader Francis Tolentino, Minority Leader Aquilino Pimentel III, at Sen. Raffy Tulfo, chairman ng Senate Committee on Public Services.
Pumirma rin sina Nancy Binay, Alan Peter Cayetano, Pia Cayetano, Ronald dela Rosa, Loren Legarda, JV Ejercito, Sherwin Gatchalian, Christopher “Bong” Go, Lito Lapid, Imee Marcos, Robinhood Padilla, Grace Poe, Ramon “Bong ” Revilla Jr., Joel Villanueva, Cynthia Villar, Mark Villar, at Juan Miguel Zubiri.
Ayon sa resolusyon, bagaman at mahalaga ang PTMP sa solusyon sa pamamahala ng trapiko, pero dapat isaalang-alang ang pangamba ng mga tsuper at transport operators na direktang mabibigatan sa pagpapatupad nito.
Sa kabila ng Abril 30, 2024 na deadline na itinakda ng Department of Transportation (DOTr) para sa konsolidasyon ng mga public utility vehicles (PUVs), tinukoy ng resolusyon na 36,217 units, o humigit-kumulang 19% ng mga jeepney at iba pang PUV, ang hindi pa nako-consolidate.
Ipinunto rin sa resolusyon na nakakaalarma ang potensyal na pag-phaseout ng iconic na disenyo ng jeepney dahil sa modernong design ng mga mini-bus na inangkat mula sa ibang mga bansa.