Alice Guo nasa Pinas pa
![Alice Guo nasa Pinas pa](https://media.philstar.com/photos/2024/07/15/2_2024-07-15_21-51-15.jpg)
MANILA, Philippines — Nasa Pilipinas pa rin at patuloy na nagtatago si Bamban, Tarlac Mayor Alice Guo matapos na isyuhan ng arrest warrant ng Senado.
Sinabi ni Sen. Sherwin Gatchalian, na pinuntahan na lahat ng mga otoridad ang mga nakarehistrong address ng bahay ni Guo kabilang dito ang mga gusali at istraktura sa QJJ Farms sa Tarlac.
Gayundin ang garments factory nila sa Marilao, Bulacan at Valenzuela subalit hindi siya matagpuan gayundin ang kanyang mga kapatid na sina Sheila, Seimen at Wesley.
Tanging ang kanyang dating accountant na si Nancy Gamo ang naaresto ng Senado kung saan siya sumasailalim sa medical check-up.
Ayon kay Gatchalian, talagang nagtatago ang alkalde subalit base sa nakuha nilang impormasyon ay nasa Pilipinas pa ito dahil hindi siya makakagamit ng mga paliparan dahil may hold departure order siya.
Si Guo ay bigong dumalo sa pagdinig ng Senado kaugnay sa raid ng POGO operations sa Tarlac kaya naglabas ng arrest order laban sa kanya.
Idinagdag naman ng Senador na mahalaga rin ang ulat ng Anti-Money Laundering Council na mayroong bilyong pisong ipinasa sa account ni Guo mula sa iba’t ibang accounts simula noong 2019-2024 at karamihan sa mga ito ay mula sa China.
Dahil dito kaya nais din matanong ni Gatchalian si Guo kung saan ito galing at bakit hindi niya ito inireport sa kanyang income statements.
- Latest