Monster ship ng China, balik-Ayungin Shoal
MANILA, Philippines — Muling namataan ang “The Monster”, pinakamalaking coast guard ship sa buong mundo ng China o CCG 5901 malapit sa Ayungin shoal sa West Philippine Sea kahapon.
Ito ay base sa X post ni US maritime security expert Ray Powell.
Ayon kay Powell, dakong alas-7:26 ng umaga nang mamataang bumalik ang dambuhalang barko ng China para sa panibagong intrusive patrol sa exclusive economic zone ng Pilipinas at sinamahan ito ng 102 meter na CCG vessel 5203 sa Ayungin shoal.
“The 165-meter China Coast Guard 5901 (‘The Monster’) has returned for another intrusive patrol in the Philippines’ exclusive economic zone and has just joined the 102-meter CCG 5203 at 2nd Thomas (Ayungin) Shoal,” ani Powell sa kanyang X post.
Wala pang kumpirmasyon ang PH Navy at PCG kaugnay sa presensiya ng Monster ship sa WPS.
Matatandaan na huling namataan ang Monster ship sa Ayungin shoal noong Hunyo 24.
Nagsimula ang paglalayag nito sa WPS kasunod ng bayolenteng insidente noong Hunyo 17 sa shoal sa pagitan ng mga tauhan ng CCG at tropa ng Pilipinas na nagsasagawa noon ng resupply mission sa BRP Sierra Madre outpost na nagresulta sa pagkasugat ng ilang Navy personnel kabilang na si Seaman First Class Jeffrey Facundo na naputulan ng hinlalaki.
Batay sa monitoring ng mga awtoridad ng Pilipinas, dumaan ang Chinese vessel sa 12feature ng WPS sa loob ng 10 araw na kinabibilangan ng Parola Island, Pagasa Island, Zamora Reef, Bayani Bank, Union Bank, Kagitingan Reef, Rizal Reef, Panganiban Reef, Lawak Island, Patag Island, Escoda Shoal, at Bajo De Masinloc.
Bukod sa mga feature na ito ng WPS, nagtungo rin ang dambuhalang barko sa tubig ng El Nido, Palawan, na malapit sa 34 nautical miles mula sa baybayin nito.
- Latest
