MANILA, Philippines — Nilinaw ng Commission on Elections (Comelec) na hahayaan munang bakante ang pwesto ni Senator Sonny Angara, na itinalaga ni Pangulong Ferdinand R. Marcos Jr. bilang Department of Education (DepEd) Secretary, hanggang sa magkaroon ng kapalit na maihahalal sa 2025 midterm elections.
“Unless there is a call from the Senate to call for a special election, the Senate seat will remain vacant,” ani Comelec Chairman George Erwin Garcia.
Aniya pa, sa midterm elections, mapupunan na ang nabakanteng slot ni Angara dahil last term niya na ngayon at 12 naman ang maihahalal.
Paliwanag niya, hindi katulad ng House of Representatives, hindi naman kailangan ng caretaker.
“In this case po, wala ng caretaker not unlike sa HRep dahil nationwide po ang constituency ng Senators,” paliwanag niya.
Bago pa man ang appointment ni Angara sa DepEd, sinabi ni Senate President Francis “Chiz” Escudero na mananatiling bakante ang slot ni Angara sakaling siya ang mapiling iupo bilang kalihim ng DepEd, kapalit ng nagbitiw na si Vice President Sara Duterte.