Teves maibabalik sa Pinas sa Hulyo – DOJ

MANILA, Philippines — Kumpiyansa ang Department of Justice (DOJ) na maibabalik na sa Pilipinas ang puganteng si dating Negros Oriental Representative Arnolfo Teves sa Hulyo, matapos paboran ng Timor-Leste ang extradition.

Sinabi ni DOJ spokesman Mico Clavano, na nagawa ng DOJ ang mga hakbang para masigurado ang tagumpay sa kasong extradition na isinampa sa loob ng 40-araw na deadline at malakas ang argumento ng pamahalaan.

Inihahanda na rin ng DOJ ang pansamantalang kulungan ni Teves na maa­ring sa NBI, PNP facility o depende sa sasabihin ng mababang korte.

Si Teves ay may 30 araw pa para ihain ang Motion for Reconsideration at ire-review ito ng Court of Appeals ng Timor-Leste bago magdesisyon.

“We are very confident na iga-grant pa rin sa atin even after the MR dahil malamang ipaparehas lang nila ‘yung kanilang arguments which we can easily controvert and defend,” ani Clavano.

Si Teves ang pangunahing suspek sa pagpatay kay Negros Oriental Gover­nor Roel Degamo at 5 iba pa noong Marso 2023.

Iginiit din ni Clavano na ang hiling na political asylum ni Teves ay walang impact sa kaso dahil ayon sa impormasyon ay ‘di na pinagbigyan.