Pinas naghain ng diplomatic protest vs China
MANILA, Philippines — Nagpadala na ang Pilipinas ng note verbale o diplomatic protest sa China dahil sa pinakahuling insidente sa Ayungin Shoal sa pagitan ng militar ng Pilipinas at China Coast Guard (CCG) noong Hulyo 17.
Ang pagpapadala ng note verbale ay kinumpirma ni Foreign Affairs Secretary Enrique Manalo sa isang international media conference kung saan pinag-usapan ang isyu sa West Philippine Sea.
Ayon kay Manalo, nakausap na niya si Chinese Ambassador Huang Xilian hinggil sa insidente pero tumanggi itong magbigay ng detalye sa mga napag-usapan.
Una nang sinabi ni DFA Undersecretary Maria Theresa Lazaro sa Pulong Balitaan sa Malacañang na pinag-iisipan ng Pilipinas na ipatawag si Chinese Ambassador Huang Xilian kaugnay ng insidente kung saan naputol ang daliri ng isang marino ng Philippine Navy.
Kamakalawa ay inihayag ni Manalo sa pagdinig sa Senado na nakatakda silang makipagpulong sa kanilang counterpart sa Hulyo para talakayin ang insidente sa Ayungin Shoal.
Sinabi pa ni Manalo na labag sa napagkasunduan nina Pangulong Ferdinand Marcos Jr. at Chinese President Xi Jinping ang naturang insidente.
Dapat din aniyang pangasiwaan ng maayos ang anumang “maritime difference” ng dalawang bansa.
Nanindigan si Manalo na dapat idaan sa pag-uusap ang nangyayaring tensiyon sa West Philippine Sea.
- Latest
