Ayungin incident sinadya ng China ‘di aksidente - Gibo
MANILA, Philippines — Sinadya ng China na pigilan ang rotation and resupply (RORe) mission ng Armed Forces of the Philippines sa BRP Sierra Madre sa Ayungin Shoal noong Hulyo 17.
Sa pulong balitaan sa Malacañang, sinabi ni Defense Secretary Gilbert Teodoro na gumamit ang Chinese Coast Guard ng puwersa para harangin ang barko ng Pilipinas.
Nilinaw ni Teodoro na hindi itinuturing ng Pilipinas na misunderstanding o aksidente ang nangyari.
“We see the latest incident in Ayungin not as a misunderstanding or an accident. It is a deliberate act of the Chinese officialdom to prevent us from completing our mission,” ani Teodoro.
Sinabi rin ni Teodoro na hindi nila isinasantabi o binabalewala ang nangyari.
“After our visit to our troops in Palawan yesterday where the President personally talked to the troops involved in the RoRe, we have now come to the conclusion that it was not a misunderstanding or an accident. We are not downplaying the incident. It was an aggressive and illegal use of force,” pahayag ni Teodoro.
Kasabay nito, sinabi rin ni Teodoro na hindi na iaanunsyo ng Pilipinas ang pagsasagawa ng rotational and resupply missions sa BRP Sierra Madre na nasa Ayungin Shoal.
“The President has reiterated that we will not publish schedules of any RoRe,” pahayag ni Teodoro.
Una nang sinabi ni Executive Secretary Lucas Bersamin na inirekomenda ng National Maritime Council kay Pangulong Marcos na ianunsyo ang RoRe missions.
Sinabi naman ni National Security Adviser Eduardo Año na ang hindi pagsisiwalat sa schedule nang pagdadala ng suplay sa Ayungin ay inirekomenda ng National Maritime Council at nagdesisyon ang Pangulo na hindi na magkakaroon ng publication tungkol sa misyon.
- Latest