MANILA, Philippines — Nagpahayag ng buong suporta si Sen. Christopher “Bong” Go sa pagpapahusay ng PhilHealth Konsultasyong Sulit at Tama (Konsulta) program, na isinama ngayon ang increase ng capitation rate sa P1,700 kada pasyente taun-taon.
Binigyang-diin ni Go na ang pagpapahusay na ito ay napakahalaga sa pagtiyak ng abot-kayang pangangalagang pangkalusugan para sa lahat ng Pilipino.
“Ang layunin natin ay masiguro na ang bawat Pilipino ay may access sa abot-kayang serbisyong pangkalusugan. Isang importanteng hakbang po ang pagtaas ng capitation rate para masiguro natin na may sapat na pondo ang mga health providers upang maibigay ang kinakailangang serbisyo,” paliwanag ni Go.
Ang Konsulta program, sa ilalim ng Universal Health Care Law, ay nagbibigay ng libreng taunang check-up, mga piling diagnostic test, at mga iniresetang gamot. Ang increase ng capitation ay magbibigay-daan sa mga karagdagang serbisyo tulad ng mammography at ultrasound screening na mahalaga sa maagang pagtuklas ng iba’t ibang kondisyon sa kalusugan.
“Sa panahon ngayon, mahalaga na palawakin natin ang saklaw ng ating mga programa sa kalusugan upang mas maraming kababayan ang makinabang,”ani Go.
Ang pag-apruba ng PhilHealth sa increase ng capitation rate ay inaasahang maipatutupad sa Hunyo 2024.