Pinas bukas sa mga negosyo kahit walang Cha-cha - Senado

MANILA, Philippines — Kahit hindi magkaroon ng pagbabago sa Konstitusyon o Charter change, bukas ang Pilipinas sa pagpasok ng iba’t ibang negosyo ng mga dayuhan, ayon sa mga senador sa pagpapatuloy nang pagdinig ng Senate Subcommittee on Resolution of Both Houses No. 6 (RBH 6).

Binanggit sa hearing ang pag-amyenda sa Public Service Act (PSA) at iba pang kaugnay na batas na naglalayong makaakit ng mga foreign investments.

Ipinunto rin nina Senators Sonny Angara, Grace Poe, Risa Hontiveros at JV Ejercito ang pag-amyenda sa Foreign Investment Act at Retail Trade Liberalization Act.

Sa umpisa ng pagdinig, binalangkas ni Angara ang mga pangunahing elemento ng mga pagbabago, na una nang iprinisinta sa pamamagitan ng batas na itinaguyod ni Poe at co-sponsored ni dating senador Franklin Drilon.

Aniya, tiniyak ng amendments na ang 60-40 ­foreign equity limitation ay tumutukoy sa mga essential public utilities tulad ng pamamahagi at paghahatid ng kuryente, petrolyo at mga produktong petrolyo, pipeline transmission system, water pipelines distribution systems, waste water pipeline systems, seaports at public utility vehicle.

Napahayag nang pag-aalala ang ilang senador sa sandaling mabuksan ang mga public utilities sa mga dayuhan.

“Puwedeng  tanggalin sa mga Pilipino ang kontrol sa lahat ng sektor na nagbibigay serbisyo sa publiko. Pwedeng makontrol ng ibang bansa ang tubig, kuryente, seaports, gasolina, at public utility jeeps natin. Handa ba tayo dito? Kaya ba nating makipagkumptensya sa kanila?” tanong ni Poe sa pagdinig.

Nagbabala naman si Hontiveros laban sa mga pontensyal na panganib ng mga susunod na kongreso na ibibigay ang kontrol sa mga state-owned foreign companies na maaaring maging banta sa seguridad ng bansa.

Pabor naman si UP Economics Prof. emeritus Raul Fabella na tanggalin ang constitutional restrictions sa foreign ownership. Anya, ang investment rate ng Pilipinas ay kabilang sa pinakamababa sa mga major Asean countries.