MANILA, Philippines — Dapat umanong ipaalam sa Guinness World of Records ang pinakamaraming bilang na nagwagi ng jackpot sa lotto ng Philippine Charity Sweepstakes Office (PCSO), ayon kay Sen. Imee Marcos.
Para kay Marcos, nakamit na ng Pilipinas ang Guinness World of Records sa pinakamaraming bilang ng nagwagi ng jackpot sa lotto.
Sinabi rin ni Marcos na lubhang nakakapagtaka ang pagdami ng bilang ng lotto winners na maaaring maitakda sa Guinness.
“Kailangan malaman ng Guinness ito, sobrang galing eh. Tayo na yata ang may pinakamaraming nanalo sa loob ng isang taon,” ayon kay Marcos.
Naitala aniya sa records ng PCSO nitong Oktubre 2023 na umabot sa 433 indibiduwal ang nagwagi sa P236 million 6/55 lottery.
“Now, we have winners almost every day,” ani Marcos.
Nauna rito, nabatikos ang PCSO matapos matuklasan ng netizens na nagpalabas ito ng edited photo ng Lotto 6/42 jackpot winner na naging viral.
Inamin naman ni PCSO General Manager Melquiades Robles na edited ang photo upang protektahan ang pagkakakilanlan ng nagwagi.