MANILA, Philippines — Isang 36-anyos na Pinay ang inaresto sa North Las Vegas, Nevada dahil sa pamamaril sa pastor sa harap mismo ng kanyang asawa at mga anak.
Ang biktimang si Nick Davi, 46, pastor ng Grace Point Church sa Las Vegas, ay nasawi habang ginagamot sa isang ospital doon habang nasugatan din ang kanyang asawa sa nasabing pamamaril.
Base sa ulat, mayroong matagal nang away sa pagitan ng biktima at suspek na hindi pa pinangalanan kaya nauwi ito sa pamamaril.
Sinabi naman ni Ty Neal, na isa rin pastor mula sa Grace Point Church sa mga otoridad na matagal nang tinatakot ng Pinay ang pamilya ni Davi.
Patuloy namang nagsasagawa ng masusing imbestigasyon ang mga otoridad para malaman ang tunay na motibo ng pamamaril.
Nahaharap naman ang Pinay sa mga kasong murder, attempted murder, discharge of firearms at dalawang bilang ng child abuse.
Kasalukuyang nakapiit ang Pinay sa Clark County Detention Center.