MANILA, Philippines — Isang grupo ng mga mangingisda sa Masinloc, Zambales ang nagpaanod ng higanteng boya effigy sa isla ng San Salvador kahapon ng umaga upang iparating sa bansang Tsina ang kanilang gutom at galit dahil sa patuloy na pangha-harass at agresyon sa Scarborough Shoal.
Ibinahagi ng Asosasyon ng mga Mangingisda sa Masinloc ang naganap na pagpapakawala at pagpapalayag sa higanteng boya na may nakasulat na “Atin Ang Pinas” na tanda ng pag-angkin sa mga karagatan na pinagkukuhanan nila ng kabuhayan na nasa teritoryo ng Pilipinas.
Ayon kay Kagawad Richard Pascual, incoming tserman ng isla ng San Salvador, umaasa ang isla sa biyaya ng karagatan, para sa kanilang pagkain, hanapbuhay.
Aniya, ang ginagawang panggigipit at agresyon ng China ay labis na nakakaapekto sa mga mangingisdang Pinoy sa Scarborough (Karburo) at sa kanilang kabuhayan.
Dagdag pa ni Pascual na ang gutom at galit nila sa China ay bunga ng patuloy na pagpigil ng Chineses ships sa kanilang pangingisda sa karburo.
Pinasalamatan din ng mga mangingisda ang lokal na pamahalaan at si Pangulong Marcos dahil sa mga susporta at pagtulong sa kanila.
“Nais ko ring magpasalamat sa aming Mayor Arsena J. Lim sa patuloy na ayuda sa aming mga mangingisda. Nagpapasalamat din kami sa ating Pangulong Marcos, sa Coast Guard dahil sa patuloy na pagtatanggol sa aming karapatan na mangisda sa karburo,” ani Pascual
Giit ni Pascual, ang payapang paglalayag sa karagatan ang kanilang tanging hiling upang buhayin ang kanilang pamilya.