PAPI: Duterte nangunguna pa rin sa pagka-senador
MANILA, Philippines — Namamayagpag pa rin si ex-President Rodrigo Roa Duterte bilang senador sa pinakahuling survey ng Publishers Association of the Philippines. Inc. (PAPI) na isinagawa noong Oktubre 2-8 sa mga barangay sa buong bansa.
Pumapangalawa sa kanya si dating senador at boxing icon Emmanuel ‘Manny’ Pacquiao at sinundan ni Sagip Party list Rep. Rodante D. Marcoleta sa ikatlong puwesto.
Nakuha ni Sen. Imee Marcos ang ika-4 na puwesto at sinundan ni Christopher Lawrence “Bong” Go. Kasunod niya ay si dating Senate President Vicente “Tito” Sotto III, at nasa ika 7-puwesto si radio-TV personality at ACT-CIS Party list Rep. Erwin Tulfo.
Kasunod ni Tulfo si Sen. Ramon “Bong” Revilla Jr., Sen. Ronald “Bato” dela Rosa at ika-10 si Sen. Manuel “Lito” Lapid.
Ang Top 20 lamang ang inilalathala ang resulta mula sa 1,000 respondents na may edad 18-50 years old.
Samantala, nakuha naman ni Sen. Pia Cayetano ang ika-11 puwesto na nasundan ni ex-Manila City Mayor Francisco “Isko Moreno” Domagoso, Interior at Local Government Secretary Benhur Abalos Jr., ex-VP Leni Robredo. Sumunod si dating Sen. Panfilo “Ping” Lacson, Sen. Francis Tolentino, ex-Sen. Gregorio “Gringo” Honasan, Dr. Willie Ong, dating Sen. Mar Roxas at nasa ika-20 at pinakahuling puwesto si Defense Secretary Gilbert “Gibo” Teodoro.
May 42,046 barangay sa buong bansa noong 2021. Ang 20% sa respondents ay mula sa A at B population, 70% mula sa C, D at 10% lamang mula sa E crowd.
Mahigit isang taon pa bago ang midterm election sa 2025 at ayon sa mga nagsagawa ng survey, marami pa ang magaganap na pagbabago. Maaring ang iba ay pumaimbulog at ang ilan naman ay bababa ang ranggo.
- Latest
