Price cap sa bigas, pinapabawi na

Supply sagana, presyo bumaba - Department of Agriculture

MANILA, Philippines — Inihayag ng mga ­opisyal ng Department of Agriculture (DA) na tumaas ang produksyon ng bigas kung saan nakakuha ang bansa ng 52 araw na suplay sa pagtatapos ng Setyembre.

Ito ang iniharap ni DA Undersecretary Mercedita Sombilla kay Pangulong Ferdinand R. Marcos Jr. sa isang sectoral meeting sa Malacañang para talakayin ang mga indicators na magiging batayan para tanggalin na ang price ceiling sa bigas na ipinataw sa ilalim ng Executive Order (EO) No. 39.

Sa kanilang presentasyon, tinukoy ng DA ang mga indicator na maghuhudyat ng pagtaas ng price cap, katulad ng pagbaba ng presyo ng bigas sa domestic market, pagtaas ng supply ng bigas at mga paborableng panlabas na salik tulad ng pagbaba ng presyo ng bigas sa buong mundo, at iba pa.

Sa isang press briefing ng Palasyo, sinabi ni DA-Bureau of Plant Industry (BPI) Director Gerald Glenn Panganiban na natugunan na ang lahat ng mga parameter kabilang na ang masaganang suplay at ang pagbaba ng presyo gayundin ang pagbaba ng presyo ng bigas sa mundo.

Ang mga rekord ay magpapakita na ang supply ng bigas sa merkado ay katumbas ng 52 araw sa pagtatapos ng Setyembre. Sa pagtatapos ng Oktubre, sa puspusang pag-aani, ang supply ay katumbas ng 74 na araw.

Bumaba na rin ang presyo ng bigas malapit sa price ceiling na may average na presyo ng regular milled rice na humigit-kumulang P41.91 kada kilo at para sa well-milled na bigas ay P45.95.

Aniya, ang inaasahang pagtaas ng suplay ng lokal na ani sa huling quarter at sa nalalabing bahagi ng taon, at ang mga naiulat na paborableng salik tulad ng pagbaba ng presyo ng eksport ng bigas sa pandaigdigang merkado ay higit na nakakatulong sa katatagan sa suplay at presyo ng bilihin.

“Kaya ‘yon at inaasahan na magkaroon ng collaborations ang DA at DTI (Department of Trade and Industry) para mas mamonitor at ma-survey ang mga presyo para hindi... muli, tumaas nang husto,” ani Panganiban.

“So, iyon ang ginagawa namin at nakikipagtulungan kami sa lahat ng ahensya ng gobyerno – hindi lang ang DA kundi pati na rin ang DTI at DILG (Department of Interior and Local Government) para ipatupad ang anumang hakbang at guidelines na magagawa namin para ang mga mamimili at, siyempre, ang ating mga stakeholder, ang mga magsasaka, na nakinabang din (ito),” pahayag nito.

Nilagdaan ni Pangulong Marcos ang EO No. 39 noong Setyembre 5, na nagtatakda ng mga limitasyon ng presyo sa regular at well-milled na bigas sa buong bansa.

Sa ilalim ng EO, ang mandated price cap para sa regular milled rice ay P41.00 kada kilo habang ang mandated price ceiling para sa well-milled rice ay P45.00 kada kilo.

Subalit, ayon kay Panganiban, mas makakabuti pa rin kung hihintayin na lamang na ianunsiyo ni Pangulong Marcos ang pagbawi sa EO.