Inflation bumilis sa 5.3 porsyento noong Agosto - PSA

MANILA, Philippines — Bumilis ng may 5.3 percent ang inflation o galaw ng presyo ng mga bilihin at serbisyo sa bansa noong Agosto.

Ayon kay Philippine Statistics Authority (PSA) chief at National Statistician Claire Dennis Mapa, bumilis sa 5.3% ang inflation nitong Agosto na mas mataas sa 4.7% rate noong Hulyo.

Dahil dito, ang average inflation mula Enero hanggang Agosto ay nasa 6.6%.

Ipinaliwanag ni Mapa na nangungunang dahilan ng pagbilis ng inflation ang mas mabilis na pagtaas ng presyo ng food and non-alcoholic beverages partikular ang bigas, gulay gaya ng kamatis at isda tulad ng tilapia.

Nakaambag din anya sa inflation ang transport dahil sa pagtaas ng presyo ng gasolina at diesel sa bansa.

Samantala, bumilis din sa 5.9% ang headline inflation sa NCR, mula sa 5.6% noong Hulyo.