MANILA, Philippines — Posibleng maging super typhoon ang bagyong Egay na nasa silangan ng Southeastern Luzon.
Sa latest monitoring ng PAGASA, ang sentro ni Egay ay namataan sa layong 900 kilometro silangan ng Southeastern Luzon taglay ang lakas ng hangin na umaabot sa 55 kilometro bawat oras at may pagbugso na aabot sa 70 km bawat oras.
Si Egay ay inaasahang patuloy na lalakas hanggang sa maabot ang Super Typhoon category sa hapon ng Lunes o umaga ng Martes habang kumikilos sa may karagatan silangan ng Luzon.
Magdadala ito ng mga pag-ulan mula Linggo hanggang Lunes ng umaga sa bahagi ng Catanduanes at Northern Samar. Ang mga lugar na hindi naman apektado ni Egay ay makakaranas din ng pag-ulan dahil sa epekto ng habagat sa may western sections ng MIMAROPA at Visayas sa araw ng Linggo.
Hindi naman kinakikitaan ng senyales na si Egay ay magla-landfall sa eastern portion ng mainland Cagayan at Batanes.
Gayunman, pinapayuhan ng PAGASA ang publiko sa nabanggit na mga lugar na mag-ingat at magsipaghanda sa banta ng bagyong Egay.