DOH: ‘Artificial sweetener’ limitahan para iwas-cancer

MANILA, Philippines — Maaaring magdulot ng liver cancer ang labis na paggamit ng mga artipisyal na pampatamis na sangkap ng mga “ultra-processed” na pagkain at mga inumin na patuloy na dapat umanong iwasan ng mga konsyumer, ayon sa Department of Health (DOH).

Ito ay base sa ulat ng World Health Organization (WHO) na pangunahing sangkap ng mga processed food at beve­rages ang pampatamis na aspartame.

“Nevertheless, we welcome the reassurance and commitment of our local food manufacturers in complying with food regulatory standards to ensure public health and safety,” ayon sa DOH.

Ang mga produkto na ginagamitan ng aspartame ang mga diet drinks, chewing gum, gelatin, iced cream, mga dairy products, cough drops at iba pa.

Para magabayan ang publiko sa pagkonsumo sa mga produkto, nakatakdang maglabas ang DOH at ang Food and Drugs Administration ng opisyal na abiso ukol dito.

Sa pagsasaliksik ng WHO sa pangunguna ni Dr. Francesco Branca, direktor ng Department of Nutrition and Food Safety, na hindi pa naman “major concern” ang kanilang pagtataya sa aspartame sa mga potensyal na epekto nito kung tamang dosage ang makokonsumo. Kailangan pa rin naman umano na imbestigahan pa itong mabuti at mas mapag-aralan.