MANILA, Philippines — Muling kinilala ng Anti-Red Tape Authority (ARTA) ang pamahalaang lungsod ng Parañaque bilang isa sa mga top performing local government units sa bansa sa pagpapatupad ng electronic business one-stop shop nito.
Sa pagdiriwang ng ikalimang anibersaryo ng ARTA, ang Parañaque at pitong iba pang lungsod ay kabilang sa mga unang awardees ng Accelerating Reforms for Improved Service Efficiency (ARISE) Awards.
Ang ARISE Awards ay isang overarching award para sa lahat ng national government agencies at local government units (LGUs), na kinikilala ang kanilang mga pagsisikap sa pagtupad sa direktiba ni Pangulong Marcos na mapabuti ang bureaucratic efficiency sa bansa.
Sa taunang inspeksyon sa pagsunod ng ARTA, binigyang-diin ng director general ng ahensya na si Ernesto Perez, ang mga pagsisikap ng Parañaque na i-streamline ang business permit at mga pamamaraan sa paglilisensya nito.
Ang compliance inspection ay bahagi ng mga mekanismo para suriin ang performance ng LGU ayon sa kinakailangan sa ilalim ng Republic Act 11032 o ang Ease of Doing Business Act of 2018.
Kinilala ni Perez ang iba’t ibang inobasyon na ipinatupad ng business permit at licensing office ng Parañaque, na pinamumunuan ng abogadong si Melanie Soriano-Malaya, partikular ang mga online na serbisyo nito sa mga kliyente sa pag-renew ng business permit at lisensya.
Ang iba pang ARISE awardees ay ang Manila, Muntinlupa, Quezon City, Navotas, Marikina, Valenzuela at Lapu-Lapu City sa Cebu.