Sasakyang Tamaraw, ibabalik sa Pinas

MANILA, Philippines — Ikinagalak ni Pangulong Ferdinand Marcos Jr. ang plano ng Toyota Japanese carmaker na ibalik sa Pilipinas ang kanilang Tamaraw model na mga sasakyan.

Ito ang ipinabatid ng mga opisyal ng kumpanya kay Marcos nitong Biyernes sa Tokyo, kaugnay sa limang araw na working visit nito sa Japan.

Sinabi ng Pangulo na ang Tamaraw ang isa sa mga pinagkakatiwalaang sasakyan na ginagamit ng mga Pinoy noong dekada 90.

Anya, marami pa ring gumagamit ng Tamaraw sa Pilipinas at kilalang-kilala ito hindi lamang sa bansa kundi sa Asian Market.

“We have always been appreciative especially in the involvement of Toyota in the Philippines over so many years and I think the mutual experience between Toyota and the Philippine and the local markets has been a good one and the partnership we can look to as a success,” saad ng Pangulo.

Tinitingnan din aniya ng gobyerno na bumili ng Mini-Cruiser sa Toyota para sa militar.

Binigyang-diin ng Presidente na marami na silang nasubukang mga sasakyan para sa militar subalit hindi rin nagtagal kaya gustong subukan ang nabanggit na modelo.

“It’s something we would like to revisit, simply because we have tried many utility vehicles for the military but they really [have] not been a success for us,” dagdag ng Pa­ngulo.