Buong bansa hinagupit ni ‘Paeng’
MANILA, Philippines — Bago pa man makapaggunita ang mga Pilipino ng Undas ay hinagupit na ng bagyong Paeng ang halos buong bansa na nagdulot ng 45 kataong nasawi dahil sa malalakas na pag-ulan, hangin, flashflood at landslide.
Naka-limang landfall ang bagyo na unang tumama ala-1:10 ng madaling araw sa Virac, Catanduanes. Sinundan ito bandang 1:40 ng madaling araw sa Caramoan, Camarines Sur, pangatlo ganap na alas-8:40 ng umaga sa Sta. Cruz, Marinduque at dakong ala-1 ng hapon sa Sariaya, Quezon.
Sa 2 pm advisory ng PAGASA, si Paeng ay kumilos pakanluran hilagang kanluran at muling tumama sa lupa sa ika-5 landfall nito sa bisinidad ng San Juan, Batangas.
Ang sentro ni Paeng ay namataan sa coastal waters ng San Juan, Batangas habang kumikilos pakanluran hilagang kanluran sa bilis na 15 kilometro bawat oras taglay ang lakas ng hangin na umaabot sa 95 km bawat oras at pagbugso na umaabot sa 130 km bawat oras.
Nakataas ang Signal number 3 sa Metro Manila, Bataan, southern portion ng Zambales, Marinduque, northern at central portions ng Quezon kasama na ang Pollilo Islands, Laguna, Batangas, Cavite, Rizal, northwestern portion ng Occidental Mindoro kasama na ang Lubang Islands, northern portion ng Oriental Mindoro, Bulacan, Nueva Ecija, Pangasinan, Pampanga, Tarlac, nalalabing bahagi ng Zambales, western at northwestern portions ng Camarines Sur, nalalabing bahagi ng Oriental Mindoro, nalalabing bahagi ng Occidental Mindoro, Romblon, Camarines Norte, nalalabing bahagi ng Quezon, the northern at central portions ng Albay at Burias Island.
Signal number 2 din sa Visayas sa northwestern portion ng Antique at sa western portion ng Aklan.
Signal number 1 naman sa marami pang bahagi ng Luzon at Visayas.
Ngayong linggo, malakas na pag-ulan ang mararanasan sa Zambales, Bataan, at Ilocos Region. Mahina hanggang sa katamtaman na minsa’y malakas na ulan sa Metro Manila, MIMAROPA, CALABARZON, at nalalabing bahagi ng Central Luzon.
Dahil sa frictional effects, hihina si Paeng at magiging isang tropical storm habang kikilos sa may Luzon landmass. Muling lalakas si Paeng at magiging isang severe tropical storm oras na marating ang West Philippine Sea ngayong linggo.
- Latest