Pangulong Bongbong Marcos, dumalaw sa burol ni Fidel V. Ramos
MANILA, Philippines — Binisita kahapon ni Pangulong Ferdinand “Bongbong” Marcos Jr. ang burol ng yumaong dating Pangulong Fidel V. Ramos sa Heritage Park sa Taguig City.
Ayon sa Pangulo, nais niyang ipahatid ang kanyang pakikiramay sa pamilya ni Ramos na isa rin niyang kamag-anak kaya bahagi ng family event ang kanyang pagpunta.
“Of course, I just came to of course offer my condolences to the family, through the former president’s wife. You also must remember that we are related with FVR and so it is also a family --- it is also part of our --- it is also a family event, the loss of FVR,” ani Marcos.
“I just reminded Mrs. Ramos of how FVR, when he became President, was a symbol of stability after all the tumultuous events of 1986,” wika niya.
Binanggit din ni Marcos na napakalma ni FVR ang bansa noong ito ay naging Pangulo at tatanawin ng lahat ang naging serbisyo nito bilang isang sundalo at public servant. Isa anyang kawalan sa bansa si Ramos.
Samantala, nagtungo rin sa lamay sina Executive Secretary Atty. Victor Rodriguez, Energy Secretary Rafael Lotilla, Labor Secretary Bienvenido Laguesma, Speaker Martin Romualdez, Special Assistant to the President Antonio Lagdameo Jr., Senator Francis Tolentino, Senator Ramon Revilla Jr. at asawang Cavite Rep. Lani Mercado.
Bumisita rin kay Ramos sina dating VP Leni Robredo at dating Senate President Vicente Sotto III.
Si Ramos, na namatay sa edad na 94, ay bibigyan ng state funeral sa Agosto 9.
- Latest
