BBM umaasang ieendorso ni Duterte bago May 9 polls

MANILA, Philippines — Umaasa si presidential frontrunner Ferdinand “Bongbong “ Marcos Jr. na pormal siyang ieendorso ni Pangulong Rodrigo Duterte bago ang Mayo 9, 2022 national election.

Ito’y sa kabila ng 10 araw na lamang at gaganapin na ang pinakaaabangang pambansang halalan sa bansa.

Bagaman inendorso na si Marcos ng PDP-Laban sa ilalim ng paksiyon ni Energy Sec. Alfonso Cusi, wala pang pormal na inihahayag ang Pangulo kung sino ang kaniyang presidential candidate.

Ayon kay Marcos, ang basbas ni Pangulong Duterte ay magbebenepisyo sa kaniyang kandidatura dahil malaki ang tiwala ng publiko sa administrasyon nito.

“We’re crossing our fingers that he will endorse but if not, I certainly understand. I think he has done everything for us, except actually endorsing us,” pag-amin ni Marcos.

Sa kabila nito ayon kay Marcos, ang pag-endorso sa kaniya ng PDP-Laban Cusi faction ay itinuturing na rin niyang parang pag-endorso na rin sa kaniya ng Pangulo.

“So para sa akin tacit endorsement na yun,” pahayag ni Marcos matapos naman pahintulutan ni Pangulong Duterte, chairman ng PDP-Laban, na eendorso ng kaniyang partido ang anak na si vice presidential candidate at Davao City Mayor Sara Duterte.