MANILA, Philippines — Inaasahan na magkakaroon ng “red alert” o manipis na supply ng kuryente sa susunod na linggo.
Ito ang sinabi ni Director Mario Marasigan, director ng Electric Power Industry Management Bureau ng Department of Energy (DOE) sa pagdinig ng Senate Committee on Energy ni Sen. Win Gatchalian.
Paliwanag ni Marasigan, inaasahan ang red alert sa linggong papasok o sa Hunyo 24 at maaaring abutin ito hanggang week 30 o hanggang sa susunod na anim na linggo.
Base umano sa nakuha nilang datos sa National Grid Corporation ay magsasabay-sabay ang maintenance ng mga planta ng mga kuryente.
Kapag red alert ay nanganganib ang brownout, subalit nilinaw ni Marasigan na hindi nila agad sinasabi na potensyal ang mga brownout dahil mayroon naman silang ginagawang mga mekanismo.