Roque: OK lang naunang bakunahan ang mga sundalo, libre naman e
MANILA, Philippines — Muling ipinagtanggol ng Malacañang ang pag-una sa mga kasundaluhan at kawani ng Presidential Security Group (PSG) sa pagtanggap ng bakuna kontra-coronavirus disease (COVID-19) ng kumpanyang Sinopharm, ito ay kahit na hindi pa ito rehistrado sa gobyerno at may ibang nakatakdang maunang mabigyan nito ayon mismo sa pamahalaan.
Sabado kasi nang aminin ni Pangulong Rodrigo Duterte na marami nang sundalo ang naturukan ng Chinese vaccine, kahit na wala pa itong approval ng Food and Drug Administration (FDA).
Basahin: Pagturok ng unregistered COVID-19 vaccine sa mga tropa 'hindi iligal' — Roque
May kinalaman: Ilang Cabinet, PSG members nauna na sa bakuna
"Basta ang ginamit kaban na galing sa taumbayan, susundin natin ang prayoridad na una nang naianunsyo na natin [sa COVID-19 vaccine]," ani presidential spokesperson Harry Roque, Martes.
"Pero ito ho, hindi po ginastusan ito ng pampublikong pondo so wala pong problema riyan."
Sa ilalim ng Republic Act 9711, o FDA ACT of 2009, ipinagbabawal ang pagpasok ng hindi rehistradong gamot sa Pilipinas:
"The manufacture, importation, exportation, sale, offering for sale, distribution, transfer, non-consumer use, promotion, advertisement, or sponsorship of any health product which, although requiring registration, is not registered with the FDA pursuant to this Act [is prohibited]."
Hindi naman masagot ni Roque kung paano nakalusot at na-import sa Pilipinas — bagay na iligal — ang hindi otorisadong gamot: "Hindi ko po alam kung paano 'yan nakalusot."
May parusang kulong at multa ang pagpapasok ng mga 'di rehistradong gamot gaya ng Sinopharm sa Pilipinas.
"[I]f the offender is a manufacturer, importer or distributor of any health product, the penalty of at least five (5) years imprisonment hut not more than ten (10) years and a fine of at least Five hundred thousand pesos (P500,000.00) but not more than Five million pesos (P5,000,000.00) shall be imposed."
Hindi naman mapaparusahan ang mga tinurukan ng bakuna, paliwanag ni Roque at ng FDA.
Health workers dapat mauna, ayon mismo sa gobyerno
Ika-7 ng Disyembre nang unang tukuyin mismo ni Roque ang mga sektor na uunahin dapat mabigyan ng COVID-19 vaccine oras na dumating ito nang ligal sa Pilipinas sa taong 2021.
Sa limang sektor na prayoridad para sa bakuna, unang-una bibigyan ang frontline healthcare workers. Huling-huli riyan ang mga sundalo, pulis atbp. unipormadong kawani.
- frontline health workers
- mahirap na senior citizen
- nalalabing senior citizen
- natitirang mahihirap na populasyon
- sundalo, pulis, coast guard, atbp.
Basahin: Kilalanin: Unang 25-M Pinoy na tuturukan ng COVID-19 vaccine ayon sa sektor
Inilabas na ng Palasyo, Lunes, ang listahan ng mahigit-kumulang 25-M Pinoy na unang bibigyan ng COVID-19 vaccine ayon sa sektor.
— James Relativo (@james_relativo) December 7, 2020
Pangunahin dito ay ang mga manggagawang pangkalusugan, senior citizens atbp. @PhilstarNews @PilStarNgayon pic.twitter.com/KNKb8KN7rm
Sa kabila niyan, tuloy pa rin sa pagdepensa sa desisyong magbakuna agad-agad sa mga sundalo ang tagapagsalita ni Duterte: "Unang-una doon sa ating mga heirarchy of priorities, naroon naman talaga ang kasundaluhan," wika niya.
Sambit pa niya, mas mainam nang nabigyan na rin ng bakuna ang PSG — kahit unathorized — para na rin "hindi kapitan ng COVID-19 ang presidente."
Kanina lang nang aminin ni Interior Secretary Eduardo Año na nabigyan na rin ng COVID-19 vaccine ang isang miyembro ng Gabinete, pero ayaw niya pang tukuyin kung sino ang opisyal.
"I only know just one member of the Cabinet, but I cannot disclose his identity because I don't want to violate his right to privacy," sabi ng kalihim.
"Let's make it clear, these vaccines were actually donated by probably someone who has access to that particular country, but there has been no commercial distribution. It's more voluntary on the part of the soldiers."
May kinalaman: Año: Only one Cabinet member vaccinated with donated unauthorized vaccine
Basahin: For everyone else: DOH, FDA warn vs use of unauthorized vaccine
'Kabastusan sa health workers'
Kinastigo naman ng grupong Coalition for People’s Right to Health ang balitang pagbabakuna na ibinulgar ni Duterte, lalo na't naitsapwera raw nito ang mga manggagawang pangkalusugan na siyang sumasabak sa gera laban sa COVID-19.
"Clearly, if it is indeed true that soldiers and PSG staff were vaccinated, then 24 million health workers and patients were bypassed, and especially leapfrogged by those not even listed yet were able to receive it illegally," ayon sa CPRH.
"Even if these vaccines were somehow donated to these government officials, ethics and FDA policies should have prevented this affront to our institutional integrity."
Sa huling ulat ng Department of Health (DOH) nitong Lunes, umabot na sa 470,650 ang tinatamaan ng COVID-19 sa Pilipinas. Patay na ang 9,124 sa kanila.
- Latest
