MANILA, Philippines — Sa gitna ng mga diumano’y fake news na ipinapakalat ng mga kritiko tungkol sa kalusugan ni Pangulong Rodrigo Duterte, sinabi ni Presidential Spokesperson Harry Roque na hindi na sila magtataka kung ang kasunod na gagawin ng mga ito ay ipakulam ang Pangulo.
Dahil aniya sa lockdown, nagkaroon ng maraming libreng oras ang mga kalaban sa pulitika at mga haters ng Pangulo na naging mga instant photo ay video analysts at patuloy ang ginagawang pagpapakalat ng fake news.
Matatandaan na may mga nagsabi sa social media na “dinoktor” ang larawang inilabas ni Sen. Bong Go kung saan kasama ni Duterte sa lamesa ang partner na si Honeylet Avanceña na may hawak na diyaryo at anak nilang si Kitty na may hawak na bata. Inilabas ang larawan bilang patunay na walang sakit ang Pangulo at nasa Davao.
Hinala ni Roque, milyong piso ang ginagastos ng mga naninira sa Pangulo na dapat aniya ay ginagamit sa pagtulong sa mga tao ngayong panahon ng pandemic.
Tinawag din ni Roque na “preposterous” ang ginagawang paninira at patuloy na paghahasik umano ng hindi totoong balita ng ilang grupo tungkol sa sinasabing pagbiyahe ni Duterte sa Singapore kahit pa may inilabas ng larawan at video si Go.