3 LGU officials kinasuhan ng DILG
Lumabag sa quarantine protocols..
MANILA, Philippines — Sinampahan ng kasong administratibo ng Department of Interior and Local Government sa Office of the Ombudsman ang tatlong lokal na opisyal dahil sa pagsuway sa ipinatutupad na quarantine protocols ng pamahalaan.
Ayon kay DILG Secretary Eduardo M. Año, dalawang kaso ang inihain nila sa alkalde at konsehal ng Sto. Tomas, Pangasinan, matapos na magdaos ng birthday celebration/mass gathering na paglabag sa social distancing at umiiral na curfew.
Aniya pa, idinulog na rin nila sa Ombudsman ang kaso laban sa alkalde ng Buluan, Maguindanao matapos na mabigong ipagbawal ang mass gatherings sa kanyang munisipalidad.
Wala rin umanong natanggap na anumang reply sa show cause order na inisyu nila sa alkalde, kaya’t ikinukonsidera na ini-waive na nito ang kanyang right to reply.
Samantala, pinadalhan rin umano ng DILG ng letter of admonition at warning ang isang city mayor at dalawang municipal mayors.
Ang city mayor na mula sa Central Luzon ay sinermunan ng departamento dahil sa pagdaraos ng mass gathering nang ipamahagi ang Social Amelioration Program (SAP) forms sa transport sector.
Isang town mayor naman mula sa Western Visayas ang sinabon ng DILG dahil sa pagtangging payagan ang isang OFW na mula sa isang COVID infected country, na mai-quarantine sa munisipalidad kahit pa may kaukulan ng mga clearance mula sa mga kinauukulan.
Ang town mayor naman sa Ilocos Region ay pinagsabihan dahil sa ‘unruly behavior’ sa mga pulis na nakatalaga sa isang checkpoint at umano’y lasing pa nang maganap ang insidente.
Bina-validate rin ng DILG ang kaso laban sa isang alkalde sa Cavite dahil sa pagdaraos ng flag ceremony noong panahon ng enhanced community quarantine at mayor sa Batangas na namahagi ng relief goods sa isang barangay hall ngunit bigong maobserbahan ang social distancing.
- Latest
