MANILA, Philippines – Ipinagbabawal muna ng Department of Health (DOH) ang pagkain ng isdang galing sa Taal Lake.
Ayon kay Health Assistant Secretary Maria Francia Laxamana, maaaring ma-food poison ang makakakain ng isda na kontaminado ng mga volcanic materials lalo na ng sulfur o asupre.
Sa ngayon aniya ay hindi ligtas kainin ang mga isdang galing sa Taal lalo na kung patay na itong nakuha sa lawa dahil sa mga posibleng nakain na masama sa kalusugan ng tao.
“Talagang ipinagbawal na. Mayroon na tayong mga advisory na lahat ng galing diyan sa Taal, Batangas dapat wala ng bibili kasi hindi natin maasahan yung safety ng mamamayan,” ani Laxamana.
Kabilang aniya sa mga sintomas ng mga nakakain ng kontaminadong isda galing sa Taal Lake ay ang pananakit ng tiyan, pagtatae at pagsusuka na kailangang magamot kaagad.