5.5 lindol uli sa Mindanao
MANILA, Philippines — Kahapon ng alas-10:33 ng umaga, niyanig ng 5.5 magnitude na lindol ang Davao Occidental na araw pa ng Undas.
Umaabot na sa 16 katao ang nasawi at 403 ang nasugatan sa dalawang napakalakas na lindol na yumanig sa Mindanao nitong nagdaang linggo, ayon sa National Disaster Risk Reduction and Management Council.
Ang mga biktima sa Davao region at Soccsksargen ay namatay dahil sa mga landslide, falling at collapsing debris at cardiac arrest dahil sa lindol.
Ang pagyanig kahapon ay naitala ng Philippine Institute of Volcanology and Seismology (Phivolcs) na nasa may 334 kilometro ng timog silangan ng Sarangani, Davao Occidental. May 033 kilometro ang lalim ng lupa ng naganap na lindol at tectonic ang ugat ng pagyanig.
Inaasahan ang aftershocks kaugnay ng pagyanig.
Bago ito, naitala din ng Phivolcs ang 4.2 magnitude na lindol alas-7:18 ng umaga kahapon sa may 025 kilometro ng hilagang silangan ng Tulunan, Cotabato.
Naramdaman ang pagyanig na ito sa lakas na intensity 2 sa Kidapawan City at intensity 1 sa Malungon Saranggani.
Wala namang ulat ng damage ang naturang mga paglindol.
Nakapagtala rin ang Phivolcs kahapon ng 1,349 aftershocks kasunod ng mga lindol na yumanig sa North Cotabato nang dalawang ulit sa loob ng tatlong araw.
Naganap noong Huwebes sa hilagang-silangan ng Tulunan, North Cotabato ang magnitude 6.5 na lindol na kasunod ng 6.6 magnitude na lindol noong Martes.
Hanggang kahapon ng tanghali, may kabuuang 381 aftershock ang naitalaga ng Phivolcs para sa 6.5 magnitude na lindol. Ang 6.6 magnitude na lindol ay nagtala ng 968 aftershocks hanggang alas-4:00 ng hapon ng Huwebes.
Inaasahan umano na magpapatuloy ang mga pagyanig sa loob ng ilang araw o linggo.
- Latest
