MANILA, Philippines — Pangatlo ang mga Pilipino sa pinakaseksing lahi sa buong mundo, ayon sa survey ng isang travel website.
Tinanong ng Big 7 Travel ang 1.5 milyong social audience nito kung saan sa palagay nila makikita ang pinakamagandang mga tao sa daigdig.
Sinabi ng website na ipinaubaya na lang sa mga respondent sa survey kung ano ang sexy para sa kanila.
Nakatanggap ng sapat na mga boto ang mga Pilipino na dahilan para pumangatlo sila sa puwesto. Nasa unahan ang Ukrainian at pangalawa ang Danish.
Ipinalalagay ng Big 7 Travel na ang pagkakakuha sa pangatlong puwesto ay dahil sa popularidad ng ilang personalidad na Pilipino sa mundo tulad ng professional boxer na si Manny Pacquiao, singer na si Bruno Mars at marami pang Miss World participant.
Ang nakaluklok ngayon na Miss Universe na si Catriona Gray ay isang Filipina beauty queen. Isa pang Pilipina na nakakuha ng titulong ito si Pia Wurtzbach may tatlong taon na ang nakakaraan.
Gayunman, hindi isiniwalat ng Big 7 Travel ang eksaktong bilang ng mga boto na nakuha nila sa survey at kahit ang breakdown nito.