SCTEx toll fee tataas

MANILA, Philippines — Nakatakda nang magpatupad ng toll fee increase ang Subic-Clark-Tarlac Expressway (SCTEx) simula sa susunod na linggo.

Ayon sa North Luzon Expressway Corporation (NLEX), na siyang operator ng SCTEx, inaprubahan na ng Toll Regulatory Board (TRB) ang hiling nitong karagdagang P0.51 per kilometer na toll hike at nakatakda nilang simulan ang koleksiyon nito simula alas-12:01 ng madaling araw ng Biyernes, Hunyo 14.

Sa ilalim ng bagong toll rates, ang mga class 1 vehicles o mga ordinaryong kotse na may rutang mula Mabalacat City (Mabiga Interchange) sa Pampanga hanggang Tarlac ay kinakailangang magdagdag ng P20 sa dating binabayarang toll fee.

Nasa P40 naman ang dagdag sa bayarin ng mga class 2 vehicles, na kinabibilangan ng mga bus at mga small commercial trucks, at P60 naman na karagdagang bayarin pa sa mga Class 3 vehicles na kinabibilangan ng mga trailer trucks.

Samantala, kung ang ruta naman ay mula Mabalacat at Tipo at Subic, ang mga Class 1 vehicles ay kinakailangang magdagdag sa dating toll fee ng P32; P66 naman ang dagdag kung Class 2 vehicles at P98 kung Class 3 vehicles.