Istilo ni Duterte ‘di babaguhin

MANILA, Philippines — Sa kabila ng batikos ng mga kritiko, tiniyak ng Palasyo na hindi babaguhin ni Pangulong Duterte ang kanyang istilo kabilang ang pagmumura dahil dito siya nakilala at ito rin ang nagdala sa kanya sa Malacañang.

Ipinahiwatig ni Presidential Spokesman Salvador Panelo na walang maaasahang pagbabago ang mga kritiko sa style ng Pangulo.

“Diyan nga siya nanalo eh bakit mo naman babaguhin,” sabi ni Panelo.

Sinabi pa ni Panelo na normal na sa Pangulo na lalong inisin ang mga naaasar sa kanya.

Hindi lamang kilala ng mga bumabatikos kay Duterte ang totoong ugali nito, wika pa niya.

Pero nilinaw ni Panelo na sa kabila ng kakaibang istilo ng Pangulo naipaparinig naman nito ang kanyang mensahe.