Angkas kinampihan ng solons
MANILA, Philippines — Sinuportahan ng ilang kongresista ang ride-hailing apps na Angkas at ang kanilang rider-partners matapos na mag-isyu ang Korte Suprema ng Temporary Restraining Order (TRO) na pinapayagan ang Land Transportation and Franchising Regulatory Board (LTFRB) na hulihin ang mga Angkas rider na may sakay na pasahero.
Ayon kay Quezon City Rep. Winston Castelo, chairman ng House Committee on Metro Manila Development, umaasa sila na mare-realize ng Korte Suprema na ang pag-isyu ng TRO sa Angkas ay lubhang makakaapekto sa Filipino commuters lalo na ngayong panahon ng kapaskuhan kung saan libu-libo ang commuters.
Isinusulong ni Castelo sa Kamara ang pag-regulate ng ride-hailing service dahil na rin sa ito ay affordable, reliable at safe mode of transportation at bunsod na rin sa maraming isyu ng mass transport sa bansa
Noong Hunyo, matapos ang congressional hearing ay nagbigay ng direktiba ang kongresista sa LTFRB at DOTr na isama ang motorcycle taxis sa kanilang dating Department of Order na mag-operate ang ride hailing apps subalit binalewala umano ito ng dalawang ahensiya.
Para naman kay Manila 5th district Rep. Cristal Bagatsing, ang TRO ng Korte ay napipigilan ang may 25,000 motorcycle riders para sa disenteng pagkakakitaan at napagkaitan ang konbinyenteng transportasyon para sa mga mananakay.
Ganito rin ang pananaw ni Ako Bicol Rep. Rodel Batocabe dahil mawawalan ng mura at maasahan na transportasyon ang publiko.
- Latest
