Pagtulong ni Bong Go sa mahihirap patuloy

Kahit wala na sa gobyerno

MANILA, Philippines — Hindi nababahala si dating Special Assistant to the President Christopher Bong Go na mawalan ng pondo para sa pagtulong sa mga mahihirap at mga nangangailangan kahit wala na siya sa gobyerno.

Sinabi ni Go na kahit noong nasa government office pa siya ay marami na siyang kaibigan at tagasuporta na tumutulong para makalikom siya ng mga ibinibigay na tulong sa mga nasunugan at iba pang nangangailangan.

Ayon kay Go, patuloy niyang hinihimok ang mga kababayan at mga kaibigang may sobra-sobrang biyaya na ngayon ang magandang panahon ng pagtulong hindi lamang sa mga nasusunugan kundi maging  ang mga sinalanta ng bagyong Rosita.

Sa katunayan, isang araw bago ang pagbisita ni SAP Bong sa mga sinalanta ng bagyong Rosita ay dumalaw at dinalhan niya ng tulong ang mga nasunugan sa barangay Kauswagan, Cagayan de Oro City.

Kabilang sa mga da­lang tulong ni SAP Bong  ang ilang food assistance, uniform ng mga batang nag-aaral, sapatos, mga school supplies at marami pang iba.