Seguridad sa COC filing ikinakasa na ng PNP

MANILA, Philippines — Dahil umiinit na ang banggaan sa pulitika at magsisimula na ang pagsusumite ng Certificate of Candidacy (COC) ng mga kandidato, ikinakasa na ng Philippine National Police (PNP) ang seguridad upang tiyakin na magiging malinis at mapayapa ang gaganaping mid-term elections sa susunod na taon.

Sinabi ni PNP Chief, P/Director Gen. Oscar Albayalde na ang maagang pagkakasa sa seguridad ay bahagi ng proactive measure upang mapigilan ang pagdanak ng dugo kaugnay ng pagsusumite ng COC sa Comelec sa Oktubre 11-17, 2018. 

“Early preparations to assume election duty in the forthcoming five-month election period for the 2019 midterm elections that will commence on January 13, 2019 until June 12, 2019,” pahayag ni Albayalde.

Sinabi nito na tiwala siyang sa pamamagitan ng maagang paglalatag ng seguridad ay magiging matiwasay ang halalan sa Mayo 2019.

Samantala, patuloy din ang paglalansag sa mga Private Armed Groups (PAGs) at pagkumpiska sa mga loose firearms upang hindi ito magamit sa karahasan.