Ligtas, malusog na lugar-paggawa tiniyak ng DOLE
![Ligtas, malusog na lugar-paggawa tiniyak ng DOLE](https://media.philstar.com/images/articles/bansa14-dole_2018-08-28_21-50-41.jpg)
MANILA, Philippines — Tiniyak ng labor department ang mahigpit na pagtupad ng mga establisyimento sa occupational safety and health (OSH) standard kasabay ng paglagda ng batas para sa ligtas at malusog na lugar-paggawa na naglalayong patawan ng parusa ang mga lalabag dito.
Ang batas na may titulong, “An Act Strengthening Compliance with Occupational Safety and Health Standards and Providing Penalties for Violations Thereof,” ay naglalayong amyendahan ang 41-taong Labor Code ng Pilipinas, na naglalaman ng walang kaparusahan sa mga lumalabag.
Pinapurihan ni Labor Secretary Silvestre H. Bello III ang paglagda sa nasabing batas dahil ito ay makapagbibigay ng ganap na proteksiyon sa mga manggagawa laban sa panganib sa kanilang lugar-paggawa.
Sakop ng batas ang lahat ng establisyimento, project site, kabilang ang mga establisyimento sa Philippine Economic Zone Authority (PEZA), at sa mga lugar-paggawa sa lahat ng sangay ng gawaing pang-ekonomiya.
Ilan sa mga pangunahing probisyon sa bagong patakaran ay ang karagdagang tungkulin ng employer, manggagawa, at iba pang indibidwal na namamahala, nagko-kontrol o nangangasiwa sa trabahong isinasagawa.
Ang hindi pagsunod o pagtanggi ng employer, contractor, o subcontractor sa pagtupad sa kinakailangang OSH standard o sa compliance order na inisyu ng DOLE ay papatawan ng administratibong multa na hindi lalampas ng P100,000 kada araw hanggang sa araw na maituwid nila ang paglabag.
- Latest