MANILA, Philippines — Hinikayat ni Sen. Bam Aquino ang pamahalaan na tiyaking mapupunta sa tamang pinaglaanan ang inangkat na bigas ng National Food Authority (NFA) upang matiyak ang supply ng abot-kayang bigas sa merkado.
Kasunod ito ng pagdating sa mga palengke ng NFA rice na inimporta ng bansa mula Thailand.
Bago rito, sinabi ng pamahalaan na inaasahan nila ang pagbaba ng presyo ng bigas sa pagdating ng unang bahagi ng imported rice, na ipapamahagi sa mga lalawigan sa Luzon at Mindanao. Ang nasabing bigas ay may dalawang uri, na ibebenta sa P27 at P32 kada kilo.
Umakyat ang presyo ng commercial rice sa merkado patungong P45 hanggang P50 kada kilo nang magkulang ang supply ng NFA rice mula noong Marso ng nakaraang taon
Sa pagdinig ng Senado, inamin ni NFA administrator Jason Aquino na nabigo ang ahensiya na tuparin ang 15-day buffer stock policy ng halos isang taon.
Dahil sa kapalpakang ito ng NFA, sinabi ni Bam na ito’y nagresulta sa pagtaas ng presyo ng bigas, kaya nadagdagan ang gastos ng pamilyang Pilipino sa bigas.
Sa kabila ng pagdating ng imported NFA rice, nanindigan si Sen. Bam na dapat magbitiw ang NFA administrator upang hindi na maulit ang nangyari noong nakaraang taon.
Nag-aalala rin si Sen. Bam na baka mapunta lang ang imported NFA rice sa mga kamay ng mga negosyante at ibenta ito sa mas mataas na presyo.