MANILA, Philippines — Nasakote ng pulisya ang isang dating kagawad na kumakandidatong chairman matapos masamsaman ng iba’t-ibang uri ng armas sa kanyang bahay sa Barangay Sta. Isabel Norte, Ilagan City, Isabela kamakalawa.
Sinabi ni Supt. Ariel Quilang, hepe ng Regional Special Operations Group na isang M14 rifle, isang desabog, isang Cal.22 rifle at sari-saring mga bala ang nakuha sa pag-iingat ni Franklin Bolibol.
Ayon kay Quilang, isinagawa ang raid sa teritoryo ni Bolibol matapos ipalabas ni Ilagan City RTC Judge Rodolfo Dizon ang search warrant sa lugar. Matatandaan na may parehong kaso si Bolibol ukol sa armas matapos siyang sitahin at ipadampot kasama ang apat pang iba nang noon ay Mayor na si Josemarie Diaz matapos silang mahuling may bitbit na matataas na kalibre ng baril sa kanyang teritoryo noong 2014.