Wrong grammar sa press ID ng Malacañang
Ang konrobersyal na press ID ng Malacañang.
MANILA, Philippines — Pinaiimbestigahan ni Presidential Communications Sec. Martin Andanar ang naging pagkakamali sa grammar sa press ID ng mga Malacañang reporters at FOCAP members na ipinamahagi ng International Press Center (IPC).
Sinabi ni Sec. Andanar, nagkaroon umano ng ‘breach of protocol’ dahil tanging ang harapan lamang ng IPC card ang nakarating sa kanyang tanggapan upang aprubahan niya at hindi niya nakita ang likuran nito.
“I ordered an investigation. There was a “breach of protocol” because only the front portion of the ID reached my office for approval. Yung likod hindi ko nakita,” wika pa ni Andanar.
Nabuko ng ilang Malacañang reporters ang mali-maling grammar sa likod ng IPC card kung saan ay si Andanar pa naman ang nakalagda dahil sa sobra nilang pagkainip na dumating si Pangulong Duterte sa kanyang event sa Cuneta Astrodome, Pasay City.
Upang hindi mabagot sa paghihintay ay nag-proofread ang ilang reporters sa nilalaman ng kanilang IPC card hanggang sa mapansin ang mga maling grammar nito.
Kabilang sa nakasaad ang “Upon expiration or when resigns from his or her agency this card should be returning without delay to the International Press Center….”
Tanging mga miyembro ng Malacañang Press Corps (MPC) at Foreign Correspondents of the Philippines (FOCAP) ang binibigyan ng IPC card ng International Press Center upang makapag-cover sa lahat ng events ni Pangulong Duterte.
Ang IPC ay nasa ilalim ng pangangasiwa ng Presidential Communications Operations Office (PCOO).
- Latest
