Gatchalian brothers pinayagan ng korte makasama si Duterte sa Russia

MANILA, Philippines – Hinayaan ng Sandiganbayan ngayong Lunes na makasama sa delegasyon ni Pangulong Rodrigo Duterte ang magkapatid na Sen. Sherwin Gatchalian at Valenzuela City Rep. Wes Gatchalian.

Sa desisyon ng Fourth Division ay maaaring umalis ang magkapatid ngayong Mayo 22 ngunit kailangan silang makabalik ng Mayo 27.

Kinasuhan ang magkapatid dahil sa maanomalyang pagbili ng Local Water Utilities Administration ng Express Savings Bank Inc. sa Laguna kung saan kabilang ang kanilang pamilya sa nagmamay-ari.

Samantala, pinayagan din ng korte na makapunta ng Toronto, Canada ang kongresista. Mula Hunyo 4 hanggang Hunyo 18 ang ibinigay sa kaniya ng hukuman.

Una nang nabasura ng kaso laban sa senador ngunit umapela pa ang prosekusyon.