MANILA, Philippines – Pinagwawatak-watak ng pamahalaan ang mga Pilipino.
Ito ang binigyang diin ni Sen. Bongbong Marcos sa kanyang pagsasalita sa Unibersidad de Manila kung saan naging mainit ang pagsalubong dito sa pangunguna ni UDM President Ernest VP Maceda.
Ayon kay Marcos, nakakalungkot lamang isipin na mismong ang mga Pilipino pa ang siyang nagiging kaaway ng kapwa Pilipino sa Pilipinas. Mas dapat aniyang itinataas ng bawat isa ang kapwa dahil bansa ang umaangat laban sa ibang bansa.
“Walang tutulong sa Pilipino kundi ang kapwa niya Pilipino kaya’t dapat lamang na binibigyan ng pansin ang gobyerno ang nation building”, ani Marcos.
Sinabi ni Marcos na wala na ang adhikaing ‘nation building’ dahil mismong ang pamahalaan ang gumagawa ng gulo sa pagitan ng mga opisyal ng pamahalaan at ng publiko.
Naniniwala rin si Marcos na mas mabuti kung ang pamamahala ng mga proyekto at programa ay direkta sa local government units. Ito aniya ang nakakaalam ng mga pangangailangan ng kanilang mga constituents.