Kampo ni Binay: Trulalu ang spluk ni VP, SONA ni PNoy chaka

MANILA, Philippines – Patuloy ang sagutan ng Malacañang at ng kampo ni Bise Presidente Jejomar Binay.

Matapos tawaging “charot” ni Presidential Spokesperson Edwin Lacierda ang “true” State of the Nation ni Binay nitong Lunes ay sumagot ang pinuno ng media affairs ng bise presidente.

"Imbey ang fez ni Secretarush dahil trulalu ang spluk ni VP. Pero ang SONA ng pangulo, chaka ever sa madlang pipol dahil hindi trulalu," pahayag ni Joey Salgado na gumamit ng “gay lingo.”

Hindi naman nagpapaapekto ang palasyo sa tuluy-tuloy na tirada ng kampo ni Binay.

"Ang sinusunod ng aming pangkat ay 'yung prinsipyo na kinakailangang maging makatotohanan at maging makatuwiran ang mga pahayag. At kasasabi ko lamang na ang focus ng aming pagpapahayag ay 'yung plataporma at mga isyu, at ang aming plataporma ay 'yung 'daang matuwid,' mabuting pamamahala. Kaya 'yon ang aming ginagamit na batayan," wika ni Communications Secretary Herminio Coloma Jr.

Kumpiyansa rin ang Malacañang na sila ang paniniwalaan ng publiko sa kabila ng paninira ng kanilang mga kritiko/

"Naniniwala kami na ang ating mga boss ay makatuwiran. Naniniwala kami na ang kanilang papanigan ay ang katotohanan. Naniniwala kami na sila ay fair o patas sa kanilang pagpapasya.”

Mula nang magbitiw sa gabinete ni Pangulong Benigno Aquino III si Binay nitong Hunyo ay sunud-sunod na ang kaniyang tirada sa gobyernong tinawag din niyang manhid at palpak.