EDCA iimbestigahan ni Miriam

MANILA, Philippines - Iimbestigahan ni Senator Miriam Defensor-Santiago ang Enhanced Defense Cooperation Agreement (EDCA) na nilagdaan sa pagitan ng gobyerno ng Pilipinas at Amerika noong Abril 28, 2014.

Ayon kay Santiago, chairman ng Senate Committee on Foreign Relations na mahalagang masagot kung kinakailangan pa ng concurrence ng Senado ang nasabing  military agreement na tatagal ng 10 taon.

Pinapayagan sa EDCA ang pagtigil sa teritoryo ng Pilipinas ng mga tropang Kano pero hindi sila puwedeng magtayo ng anumang uri ng military base o maglagay ng nuclear weapon sa bansa.

Naniniwala si Santiago na mahalagang malaman kung kinakailangan pa ba talaga ng na­sabing military agreement at kung makakatulong ito sa bansa.

Bagaman at may nakahain ng petisyon na kumukuwestyon sa constitutionality ng EDCA, hindi ito hadlang sa gagawing imbestigasyon.

Tatalakayin din sa pag­dinig ang constitutional ban ng mga foreign military bases, troops o pasilidad.