MANILA, Philippines - Utas ang isang binata nang pagbalingan itong saksakin ng nag-amok na lalaki sa lungsod Quezon kahapon ng madaling araw.
Sa ulat ng Quezon City Police District-Criminal Investigation and Detection Unit, nakilala ang nasawi na si Leo Bermoy, 29, ng Palawan St., Phase 4, Lupang Pangako, Brgy. Payatas B., sa lungsod.
Ang suspek na pinaghahanap ngayon ng awtoridad ay nakilalang si Rey Eleazar Manuguil, residente din sa nasabing barangay.
Sa ulat ni SPO1 Cris Zadarriaga, nangyari ang insidente sa may Phase 3, corner Block 4, Lupang Pangako, ganap na ala- 1:30 ng madaling araw.
Sabi ng isang testigo, nagsasakay siya ng mga nakulektang plastic sa truck kung saan nakita niya ang suspek na sinaksak ang biktima.
Kahit sugatan, nagawa pa anya ng biktima na makatakbo papalayo pero hinabol pa ito ng suspek at ng maabutan ay saka muling sinaksak sa katawan.
Ayon naman kay PO3 Jayson Tolentino ng Police Station 6, base sa imbestigasyon, bago ang insidente, nakatayo umano ang biktima sa lugar nang mapagdiskitahan ng suspek matapos na takbuhan ng isang grupo ng kalalakihan na siyang tunay na kaaway.
Patuloy ang imbestigasyon ng otoridad sa nasabing insidente.