MANILA, Philippines - Kalunus-lunos na kamatayan ang sinapit ng isang lola habang himalang nakaligtas ang 3-anyos nitong apo nang mabundol ng isang pampasaherong bus, kahapon ng umaga sa Caloocan City.
Kinilala ang nasawi na si Leticia Ocale, 63, residente ng Brgy. Tonsuya, Malabon City. Isinugod naman sa Caloocan City Medical Center ang paslit na si John Michael Ocale, na himalang nagtamo lamang ng mga galos sa noo.
Agad namang nadakip ang tsuper ng nakabundol na ALRO Bus Company na may plakang TYR-774 na nakilalang si Gerardo Maquirang, ng Letre, Brgy. Tonsuya, Malabon City.
Sa inisyal na ulat ng Caloocan Police-Traffic Enforcement Unit, naganap ang insidente dakong alas-10 ng umaga sa kahabaan ng C-4 Road, ng naturang lungsod. Kabababa pa lamang ng maglolang Ocale buhat sa isang pampasaherong jeep nang masagi ng isang rumaragasang pampasaherong bus.
Napailalim sa naturang bus ang matanda at nagulungan pa habang tumalsik ang akay nitong apo sa gilid ng kalsada at nakaligtas sa kamatayan.