MANILA, Philippines - Pinapayagan pa ring makabalik sa Kenya ang ilang Pinoy workers sa kabila ng pinaiiral na temporary deployment ban laban sa pagpapadala ng mga bagong hire na OFWs doon.
Nilinaw ng Philippine Overseas Employment Administration (POEA) na puwede pa ring makabalik sa naturang bansa ang mga OFWs na nagtatrabaho sa United Nations (UN) at mga affiliate agencies nito.
Nakasaad sa bahagi ng Resolution No. 16-2014 ng POEA governing board na, “The UN workers in UNEP, Habitat, and other UN agencies in Kenya shall not be covered by the deployment ban of new workers.”
Una nang ipinagbawal ng POEA ang pagpapadala ng mga bagong hire na OFW sa Kenya matapos itaas sa Crisis Alert Level 2 ng Department of Foreign Affairs ang sitwasyon roon dala ng paglala ng mga kaguluhan.