MANILA, Philippines - Makaraang lumabas ng Philippine Area of Responsibility (PAR) ang bagyong Glenda na kumitil ng maraming buhay at sumira ng mga ari arian ay isa na namang sama ng panahon o Low Pressure Area (LPA) ang patuloy na minomonitor ng PAGASA at kapag tuluyang pumasok sa PAR ay tatawagin bagyong Henry.
Sinabi ni Fernando Cada, weather forecaster ng PAGASA, huling namataan ang LPA sa layong 970 kilometro sa silangan ng Northern Mindanao.
Ayon kay Cada, masyado pang malayo sa bansa ang naturang LPA kayat wala pang makapagsasabi na ito ay magiging sinlakas ni bagyong Glenda. Bagamat maaari anya itong maging isang bagyo.
“Malayo pa itong LPA, hindi pa natin kinakikitaan ng anumang banta dahil sa mahina pa ang hangin nito kayat patuloy naming itong minomonitor sa kasalukuyan,” pahayag ni Cada.
Kung magbago anya ng lakas at direksiyon ang naturang LPA at maging ganap na bagyo ay tatawaging Henry.