MANILA, Philippines - Magbubunga umano ng problema sa mga guro ang ipinatutupad na programang K to 12.
Sinabi ni Lingayen-Dagupan Archbishop Socrates Villegas, pangulo ng Catholic Bishops’ Coference of the Philippines (CBCP) na dahil sa K to 12 program ay inaasahan nang ang mga higher education institutions (HEIs), colleges at universities ay mawawalan na ng freshmen sa taong 2016. At kung mawawalan ng mga estudyante ay posibleng mawalan na rin ng trabaho mga guro.
Gayunman, hindi na aniya dapat pang magsisihan dahil tinanggap na ng bansa ang K-12 at ang dapat na lamang gawin ay ang umagapay sa mga hamon na dulot nito.
Ayon kay Villegas, bagamat may opsyon naman ng redundancy at retrenchment provisions ang labor law, tutol pa rin ang CBCP na basta na lamang matanggal sa trabaho ang mga naturang guro.
Hinikayat ni Villegas ang mga trustees ng mga Catholic school corporations at school officials na maging ‘creative’ at magbigay ng mga oportunidad para sa re-tooling at re-training ng mga instructors at professors sa tertiary education upang magawa ng mga ito na hawakan ang mga subjects sa academic track ng senior high school.
Aminado naman si Villegas na maraming guro ang pumapasok lamang ng trabaho sa Catholic schools habang naghihintay ng mas magandang oportunidad sa mga higher-paying institutions.
Umapela naman siya sa mga Catholic school teachers, instructors at mga professors, gayundin sa mga graduates ng teacher education courses na hindi lamang maging committed sa serbisyo kundi isapuso at gawing pangunahing motibo sa pag-aaplay sa Catholic schools ang command ng Huling Hapunan na magmahal ng walang anumang kondisyon upang magawa nating hugasan ang paa ng isa’t isa.