Nabulok na relief goods sa Leyte pinasisiyasat

MANILA, Philippines - Pinaiimbestigahan ni Valenzuela Rep. Sherwin Gat­chalian sa Kamara ang umano’y ulat sa ibinaon na nabulok na relief goods sa Leyte.

Ayon kay Gatchalian, kahit na naka-recess ang Kongreso ay maaari naman magpatawag ng special probe kahit walang sesyon ang Kamara upang ma­bigyang linaw agad ang naturang isyu at maparusahan ang mga nasa likod ng pagpapabaya na ma-expire ang mga relief para sa Yolanda victims.

Iginiit ni Gatchalian na hindi lamang national inte­rest ang nakasalalay dito kundi ang imahe ng bansa sa international community na tumulong sa mga nasalanta ng bagyo.

Nakakahiya umano at hindi katanggap-tanggap kung mapatunayang totoo ang ginawa ng DSWD na nauna namang pinasinungalingan ng ahensya.

Tinukoy nito ang report ng World Bank na one-quarter hanggang one-third ng mga pagkain na pinoproduce ay naitatapon lamang sa basurahan o nawawala kapag ibinibiyahe sa mga pamilihan kung saan tinukoy ni World Bank president Jim Yong Kim na “shameful” o kahihiyan ito dahil milyon-milyong tao sa buong mundo ang nakakaranas ng gutom.