MANILA, Philippines – Iginiit ng Malacañang ngayong Biyernes na legal ang pagdakip ng mga awtoridad sa negosyanteng si Delfin Lee.
Sinabi ni Deputy Presidential Spokesperson Abigail Valte na kahit ibinasura ng Court of Appeals ang arrest warrant ay naiakyat naman ito ng Department of Justice sa Korte Suprema para hind imaging final at executory.
"The mode of appeal, as lawyers like to call it, was under Rule 45 of the Rules of Court. Thereby, hindi po naging final and executory dahil nagsampa tayo ng apela sa naging desisyon ng Court of Appeals," wika ni Valte.
Kaugnay na balita: Lee nakakulong na sa Pampanga
"And to prove positive the fact that it did not become final and executory are two things: one, the warrant of arrest was not recalled, which is normally the case when the quashing is made final, pero hindi pa ito na-recall; at pangalawa, yung hold departure order against Delfin Lee was not lifted," dagdag niya.
Nahaharap sa kasong syndicated estafa ang pinuno ng Globe Asiatique dahil sa umano’y pagkubra ng P6.6 bilyon na housing loans gamit ang mga pekeng borrowers.
Nagtago si Lee noong Mayo 2012 mula nang iutos ng San Fernando Regional Trial Court ang pag-aresto sa kanya.
Isa si Lee sa mga kilabot na wanted ng bansa na may patong sa ulo na P2 milyon.
Nadakip ng pinagsamang puwersa ng Task Force Tugis at Manila Police District ang negosyante kagabi sa harap ng Hyatt Hotel and Casino.
Kasalukuyang nakakulong ngayon si Lee sa kustodiya ng National Bureau of Investigation sa Pampanga.
"I recall, at one event, the President did mention na 'kahit kayo magtago, mahahanap at mahahanap kayo.' So this is a good step, at least for government because, finally, cases can move," banggit ni Valte.